Kea ɛ 'bɛɛ ɛɛ' 'nynɩ "i 'de 'blʋa ‑wee'‑ "klein" "kpei
57
Dafi 'a 'dʋ. Ɔ "nyɩa 'dʋ ‑jeopoi ɛ. Ɛ ke ‑ɩn ‑bo ɛ i ‑sa a 'a blesʋn nɩɛ due'. Dafi 'a ‑ɩn ple Sailɩ "juɛi, ‑ɩn ‑wlaa' 'e crʋ 'a ‑kwlewɔn 'di mɛ 'dʋ ‑nɛ ɛ 'tmʋ.a
2 Ɛ 'je 'ma wɛe‑, 'oo 'ma Kea, ɛ 'je 'ma wɛe‑,
'de ɛ 'ʋn mɔ 'ma ‑pɔn 'pʋʋa i, 'ma nyiɔ jɔ ‑pɔn
'de ɛɛ' ‑fli ‑sɔn i ‑tea' i mamaʋ 'sʋ nai" ‑tɩ ‑nɛ 'je ‑si'.
3 Kea ‑nɩa 'e dɩ ‑wee'‑ "klein "jrukpɔ',
Kea ‑ɛ nʋa 'ʋn 'dɔe "jrii, ɛmɛ 'ma wee o.
4 Ɛ ‑sa 'pʋʋa 'de jaʋn 'di ɛ jeɛ 'ʋn ja, dɛ ‑nʋɛ,
'ma 'kle ‑tu" nyʋ a ‑sɔɔan' 'ʋn 'wɔn i. ‑Te' ‑kwlʋ.
Kea nmɔ 'diwɔn, ɛɛ' poo wlu fai" 'de 'ʋn ‑pee.
5 'Ɩn 'pɛn i 'de ‑plaa "klu.
'De nyʋ ‑ʋʋa dia nyʋ 'wɔn i ‑kwea'‑
nyʋ ‑ʋʋa 'nynɩ nɩa 'mɩmɩ ka "di e 'sɩn nɩa
‑wɛe ‑ʋʋa mɩɩɔ nma" ka ‑placnɛ nɩa.
6 'Oo Kea, ɛ to ɛɛ' "i 'bɛɛa' 'de jaʋn "jru kpɔ',
‑wɛe ɛɛ' dɛwɔnɩa' 'je 'blʋa ‑wee'‑ "klein "kpei 'bɛɛ‑.
7 Ʋʋ dba nya" sai 'bo 'ma ‑jei", 'ma jiɛ 'di 'kpaa 'de‑,
ʋʋ "bluɛ "bie 'bo 'ʋn "juɛi, 'kaa ʋʋa' ‑cɛ" ‑blu' 'de ɛ 'di. ‑Te' ‑kwlʋ.
8 'Ma pɛe kuɛ i, 'oo Kea, 'ma pɛe kuɛ i.
'Ma muɛ blea', 'ma muɛ blea' 'ɩn 'jeɛ 'nynɩ ‑sa.
9 'Ma nyiɔ jɔ‑ ɛ sɔn "nyɩɔ,
'ma ‑si' ‑plʋ ke 'ma blaadɩ ‑blea "dbu ɛ,
'ma muɛ ‑suu ‑kɛ" wɔn kpʋan'.
10 'Ma 'blei, 'ma muɛ 'nynɩ ‑saa' 'de nyʋ "klu,
‑wɛe 'ɩn 'je dɩ bla 'ɩn 'je ble 'de 'blʋa "kpei.
11 Dɛ ‑nʋɛ ɛɛ' 'diwɔnmɔa' ‑siiɛ jaʋn "jrui,
‑wɛe ɛɛ' wlu i kpʋan' ‑sii "ni "jrui 'de "jɛi.
12 'Oo Kea, ɛ to ɛɛ' "i 'bɛɛa' 'de jaʋn "jru kpɔ',
‑wɛe ɛɛ' dɛwɔnɩa' 'je 'blʋa ‑wee'‑ "klein "kpei 'bɛɛ‑.